29.03.2024, Juma

HAYaL-QÍZLARDÍ KÁSIP-ÓNER HÁM ISBILERMENLIKKE OQÍTÍW SISTEMASÍN JETILISTIRIWGE BAYLANÍSLÍ QOSÍMShA ILAJLAR HAQQÍNDA

Ózbekstan Respublikası Prezidentiniń

qararı

Elimizde hayal-qızlardıń sociallıq-ekonomikalıq jaǵdayın jaqsılaw, olardıń isbilermenlik jumısın arttırıw, qásipke oqıtıw hám bántligin támiyinlew, isbilermen hayal-qızlardıń ekonomikanı rawajlandırıwdaǵı rolin bunnan bılay da arttırıw, sonday-aq, Ózbekstan Respublikası Prezidentiniń 2022-jıl 7-marttaǵı «Shańaraqtı hám hayal-qızlardı sistemalı qollap-quwatlawǵa baylanıslı jumıslardı bunnan bılay da jedellestiriw ilajları haqqında»ǵı PP-87-sanlı pármanınıń orınlanıwın támiyinlew maqsetinde:

1. Sonday tártip ornatılsın, oǵan muwapıq:

Jaslar hám hayal-qızlardı jáne isbilermenlikke oqıtıw baǵdarlamalarına qatnasatuǵın mámleketlik emes shólkemlerdiń elektron reestirne kirgizilgen mámleketlik emes bilimlendiriw shólkemleri (keyingi orınlarda – mámleketlik emes bilimlendiriw shólkemleri), professional bilimlendiriw mákemeleri, sonday-aq, Biznes hám isbilermenlik joqarı mektebiniń (keyingi orınlarda – Joqarı mektep) kásip-ónerge úyretetuǵın oqıw kurslarına baǵdarlanǵan jaslar hám hayal-qızlar ushın Máhálle kesiminde islesiw hám isbilermenlikti rawajlandırıw agentliginiń aymaqlıq basqarmaları tárepinen úsh tárepleme shártnama tiykarında oqıw kursları bahasınıń 70 procenti, biraq 1 million sumnan aspaǵan bólegi kompensaciyalanıp beriledi;

úsh tárepleme shártnama puqara, Máhálle kesiminde islesiw hám isbilermenlikti  rawajlandırıw agentliginiń aymaqlıq basqarmaları hám usı bántte kórsetilgen bilimlendiriw shólkemleri arasında máhállede isbilermenlikti  rawajlandırıw, xalıqtıń bántligin támiyinlew hám kámbaǵallıqtı qısqartıw máseleleri boyınsha rayon (qala) hákiminiń járdemshileri (keyingi orınlarda – hákim járdem shileri) usınısına bola dúziledi;

«Hayal-qızlar dápteri»ne, «Jaslar dápteri»ne, hám «Temir dápter»ge kirgizilgen  jaslar hám hayal-qızlardı Joqarı mektep tárepinen oqıtıw jumısları tolıq biypul ámelge asırıladı;

mámleketlik emes shólkemler, professional bilimlendiriw mákemeleri hám Joqarı mekteptiń kásip-óner baǵdarı boyınsha oqıw kursların tamamlaǵan jumısssız hayal-qızlar Bántlik hám miynet qatnasıqları ministrligi tárepinen bar bos jumıs orınlarına jaylastırıladı;

isbilermenlik baǵdarı boyınsha oqıw kursların tamamlaǵan hayal-qızlarǵa isbilermenlik subekti sıpatında mámleketlik dizimnen ótiwden baslap, óz jumısın erkin alıp barıwǵa shekemgi processte hákim járdemshileri tárepinen sistemalı túrde ámeliy járdem kórsetip barıladı.

2. Máhálle kesiminde islesiw hám isbilermenlikti rawajlandırıw agentligi janındaǵı Xalıqtı isbilermenlikke tartıw qorı tárepinen miynetke jaramlı, mayıplıǵı bolǵan hayal-qızlardı jumıs penen támiyinlegen jumıs beriwshiler ushın  6 ay dawamında hár ayda bazalıq esaplaw muǵdarınıń 2 esesinen az bolmaǵan muǵdarında subsidiya ajıratılatuǵını belgilensin;

Ekonomikalıq rawajlanıw hám kámbaǵallıqtı qısqartıw ministrligi eki ay múddette miynetke jaramlı, mayıplıǵı bolǵan hayal-qızlardı jumıs penen támiyinlegen jumıs beriwshiler ushın subsidiyalar ajıratıw tártibin názerde tutatuǵın Húkimet qararınıń joybarın Ministrler Kabinetine kirgizsin.

3. Sonday tártip ornatılsın, oǵan bola; «Hayal-qızlar dápteri»ne, «Jaslar dápteri»ne, hám «Temir dápter»ge kirgizilgen  puqaralarǵa, birinshi gezekte, hayal-qızlarǵa hákim járdemshisiniń usınısı tiykarında jergilikli mámleketlik hákimiyat uyımlarınıń «Saqawat hám kómek» qorı esabınan mámleketlik emes bilimlendiriw mákemeleri hám professonal bilimlendiriw mákemeleriniń oqıw kursı bahasınıń qalǵan 30 procent bólegi Máhálle kesiminde islesiw hám isbilermenlikti rawajlandırıw agentliginiń aymaqlıq basqarması, jergilikli atqarıwshı hákimiyat uyımları, tiyisliligi boyınsha mámleketlik emes bilimlendiriw shólekemleri yamasa professional bilimlendiriw mákemeleri hám puqara arasındaǵı shártnamaǵa muwapıq aldın ala tólew arqalı qaplap beriledi.

4. Máhálle kesiminde islesiw hám isbilermenlikti rawajlandırıw agentligi Bántlik hám miynet qatnasıqları ministrligi, Shańaraq hám hayal-qızlar mámleketlik komiteti, Sawda-sanaat palatası jáne Joqarı mektep penen birgelikte bir ay múddette:

hár bir máhálle kesiminde jumıssız dep tabılǵan hám islew yamasa isbilermenlik penen shuǵıllanıw tilegin bildirgen hayal-qızlardıń baslanǵısh dizimin qáliplestirsin;

Bántlik hám miynet qatnasıqları ministrligi janındaǵı «Jumısqa márhamat» monoorayları, Joqarı mekteptiń aymaqlıq filialları, Sawda-sanaat palatasında qáliplestirilgen dizimlerge kirgizilgen hayal-qızlardıń kásip-ónerge («Birden-bir milliy miynet sisteması» uyımlararlıq programmalıq-apparat kompleksiniń elektron málimleme sistemasında bar bos orınlarınan kelip shıqqan halda) hám isblermenlikke oqıtılıwın támiyinlesin;

hákim járdemshileriniń usınısına tiykarlanıp kásip-óner baǵdarları boyınsha kurslardı tamamlaǵan hayal-qızlardıń bántligin támiyinlew baǵdarında «Onlayn-máhálle» platformasın Bántlik hám miynet qatnasıqları ministrliginiń «M3hna5.7z» platformasına integraciyalaw arqalı olardı bar bos jumıs orınlarına baǵdarlasın.

5. Shańaraq hám hayal-qızlar mámleketlik komiteti mápdar ministrlikler hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.

 6. Usı qarardıń orınlanıwın nátiyjeli shólkemlestiriwge juwapker hám jeke juwapker etip Máhálle kesiminde islesiw hám isbilermenlikti rawajlandırıw agentliginiń direktorı M.M.Ubaydullaev belgilensin.

 Qarardıń orınlanıwın dodalap barıw, orınlawǵa juwapker uyımlardıń jumısın muwapıqlastırıw hám qadaǵalaw Ózbekstan Respublikası Bas ministriniń orınbasarları J.A.Qwchqorovqa hám Z.B.Maxkamovaǵa júklensin.


Ózbekstan Respublikası

Prezidenti    Sh.MIRZIYoEV

Tashkent qalası,

2022-jıl 22-iyul