29.03.2024, Juma

2022-2026-JÍLLAR DAWAMÍNDA ÁMELGE ASÍRÍLÍWÍ MÓLShERLENGEN «QÁWIPSIZ HÁM TEGIS JOL» ULÍWMAMILLIY BAǴDARLAMASÍN TASTÍYÍQLAW HAQQÍNDA

Ózbekstan Respublikası Prezidentiniń

qararı

Ózbekstan Respublikası Prezidentiniń 2021-jıl  29-noyabrdegi «Ózbekstan Respublikası jámiyetlik qáwipsizlik koncepciyasın tastıyıqlaw hám onı ámelge asırıw ilajları haqqında»ǵı PP-27-sanlı Pármanınıń orınlanıwın támiyinlew, sonday-aq, jol háreketin shólkemlestiriw sistemasın bunnan bılay da jetilistiriw, avtomobil jolları infrastrukturasın rawajlandırıw hám jol háreketi qatnasıwshıları ushın qolaylı sharayatlar jaratıw maqsetinde:

1. Jol infrastrukturasın jetilistiriw hám qáwipsiz háreketleniw sharayatların jaratıw arqalı jollarda avariyalıq hám ólimshilik jaǵdayların keskin qısqartıw, sonıń ishinde, háreketti basqarıw sistemasın tolıq sanlastırıw hám jámiyetshiliktiń usı tarawdaǵı jumıslarǵa keńnen qatnasıwın támiyinlew maqsetinde tómendegilerdi názerde tutatuǵın 2022-2026-jıllar dawamında respublika aymaǵında ámelge asırılıwı mólsherlengen «Qáwipsiz hám tegis jol» ulıwmamilliy baǵdarlaması (keyingi orınlarda – Baǵdarlama) qosımshaǵa muwapıq tastıyıqlansın:

avtomobil jolları infrastrukturasın kompleksli jetilistiriw;

avtomobil jolları háreketin basqarıw sistemasın sanlastırıw;

jámiyetlik transporttı rawajlandırıw hám sanlastırıw;

jol háreketi qáwipsizligin támiyinlew boyınsha úgit-násiyat jumısların kúsheytiw, balalarǵa jol háreketi qaǵıydaların ámeliy úyretiwdi jolǵa qoyıw;

aydawshılardı tayarlaw hám qayta tayarlaw sistemasın jetilistiriw jáne transport qurallarınıń texnikalıq jaǵdayı ústinen qadaǵalawdı kúsheytiw.

2. Baǵdarlamada belgilengen mánzilli ilajlardıń ámelge asırılıwın óz waqtında hám tolıq támiyinlewge qaratılǵan tómendegi qadaǵalaw tártibi ornatılsın:

Qaraqalpaqstan Respublikası, wálayatlar hám Tashkent qalası prokurorları – hár sherekte juwapker mámleketlik uyımlar tárepinen Baǵdarlama orınlanıwınıń ámelge asırılıwı boyınsha aymaqlar kesiminde úyreniwlerdi ótkeriw hám nátiyjeleri boyınsha Bas prokuraturaǵa málimleme beriwdi shólkemlestirsin;

Bas prokuratura (N.T.Ywldashev), Esap palatası  (B.T.Turabov) – hár sherekte juwapker mámleketlik uyımlar basshılarınıń Baǵdarlamanıń orınlanıwı, sonıń ishinde, aymaqlar kesiminde ámelge asırılıwı boyınsha esapların tıńlaw hám orınlanbaǵan máseleleri boyınsha sın kózqarastan dodalaw maqsetinde Jol háreketi qáwipsizligin támiyinlew boyınsha respublikalıq arnawlı komissiyaǵa málimleme kirgiziw ámeliyatın jolǵa qoysın;

Ministrler Kabineti (A.N.Aripov) – hár yarım jılda Baǵdarlamanıń orınlanıwın aymaqlar kesiminde sın kózqarastan dodalaw, orınlanıwı boyınsha kemshiliklerge jol qoyǵan juwapker basshılarǵa intizamiy jaza sharaların kóriw, sonday-aq, Baǵdarlamada belgilengen ilajlardı tolıq ámelge asırıwdı shólkemlestirsin.

Baǵdarlamada belgilengen mánzilli ilajlardıń óz waqtında hám tolıq orınlanıwın sózsiz támiyinlew ushın juwapkershilik jeke Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası hákimleri, Ishki isler ministri, Transport ministrligi janındaǵı Avtomobil jolları komitetiniń baslıǵına júklensin.

3. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri:

Baǵdarlamada belgilengen ilajlardı ámelge asırıw boyınsha anıq mexanizmlerdi názerde tutatuǵın mánzilli ilajlardı óz ishine alǵan «jol kartası»n hár jılı islep shıqsın hám tastıyıqlaw ushın Jol háreketi qáwipsizligin támiyinlew boyınsha respublikalıq arnawlı komissiyaǵa kirgizsin;

hár sherekte jollardıń jaǵdayı hám ámeldegi infrastruktura, avariya oshaqları, qaǵıydabuzıwlar jaǵdayın tallaw tiykarında, háreket qáwipsizligi, transport hám jol tarawlarına juwapker shólkemlerdiń basshılarınıń jumısın sın kózqarastan úyrenip Qaraqalpaqstan Respublikası Joqarǵı Keńesi, Xalıq deputatları wálayatlıq hám Tashkent qalalıq Keńeslerine dodalaw ushın kirgizip barsın.

4. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri, Ishki isler ministrligi, Transport ministrligi janındaǵı Avtomobil jolları komiteti:

Baǵdarlama sheńberinde ámelge asırılıp atırǵan ilajlarda jámiyetshiliktiń qatnasıwın támiyinlewge hám «Ashıq byudjet» málimleme portalı arqalı qaratılıp atırǵan qarjılardan áyne usı baǵdarda nátiyjeli paydalanıwǵa ayrıqsha itibar qaratsın;

Ózbekstan Milliy málimleme agentligi, Ózbekstan Milliy teleradiokompaniyası menen birgelikte usı qarardıń maqseti hám wazıypaları ǵalaba xabar qurallarında keńnen sáwlelendiriliwin támiyinlesin.

5. Baǵdarlamada názerde tutılǵan ilajlar hár jılı byudjet qarjıların bólistiriwshilerge ajıratılatuǵın qarjılardıń sheklengen muǵdarları sheńberinde, sonday-aq, «Qáwipsiz jol hám qáwipsiz piyada» respublikalıq qorı qarjılarınıń esabınan ámelge asırılatuǵını belgilensin.

6. Usı qarardıń orınlanıwın nátiyjeli shólkemlestiriwge juwapker hám jeke juwapker etip Bas prokuror N.T.Ywldoshev, Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası hákimleri, ishki isler ministri P.R.Bobojonov hám transport ministri I.R.Mahkamovlar belgilensin.

Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa, Ózbekstan Respublikası Prezidentiniń keńesgóyleri B.D.Islamov hám R.A.Gulyamovlarǵa júklensin.

Ózbekstan Respublikası

Prezidenti Sh.MIRZIYoEV

Tashkent qalası,

2022-jıl 12-iyul

--0--