29.03.2024, Juma

AVTOTRANSPORT QURALLARÍN BASQARÍWDA HÁM JÓNELISSIZ TAKSI JUMÍSÍN ÁMELGE ASÍRÍWDA QOSÍMShA QOLAYLÍLÍQLAR JARATÍW HAQQÍNDA

Ózbekstan Respublikası Prezidentiniń

qararı

Avtotransport qurallarınan paydalanıwda xalıqqa qosımsha qolaylılıqlar jaratıw, respublikada jolawshı tasıw transport sistemasın rawajlandırıw, bul baǵdarda kórsetilip atırǵan xızmetlerdiń sapasın arttırıw, jumıssızlıqtı qısqartıw jáne transport xızmetleri bazarın rawajlandırıw maqsetinde:

1. 2022-jıl 1-sentyabrden baslap avtotransport qurallın basqarıw huqıqın beretuǵın isenim xatların Birden-bir interaktiv mámleketlik xızmetler portalı arqalı elektron tárizde rásmiylestiriw sisteması engizilsin.

2. a) elektron tárizde rásmiylestirilgen avtotransport quralın basqarıw huqıqın beretuǵın isenim xatın (keyingi orınlarda – elektron isenim xatı) notarial tastıyıqlaw talap etilmeytuǵını;

b) elektron isenim xatın rásmiylestiriw ushın mámleketlik bajı onıń ámel etiw múddetinen kelip shıqqan halda isenim xatın notarial tastıyıqlaw ushın ornatılǵan mámleketlik bajıǵa salıstırmalı tómendegi procentlerde óndiriletuǵını:

bir ayǵa shekemgi múddetke -10 procent;

altı ayǵa shekemgi múddetke -  50 procent;

úsh jılǵa shekemgi múddetke - 100 procent.

v) elektron isenim xatı bar ekeni Mámleketlik jol háreketi qáwipsizligi xızmetiniń xızmetkerleri tárepinen mobil qurılmalar arqalı tekseriletuǵını;

g) elektron isenim xatı rásmiylestirilmegen avtomobil quralın  basqarıw huqıqın beretuǵın avtomobillerge  ámeldegi notarial tastıyıqlaw tártibi saqlap qalınatuǵını belgilep qoyılsın.

 3. Yuridikalıq táreplerge tiyisli avtotransport quralların basqarıp atırǵan shaxslardıń eki jılda bir márte májbúriy mamanlıǵın arttırıw talabı biykar etilsin.

4. 2022-jıl 1-sentyabrden baslap puqaralar hám jolawshı tasıw jumısın ámelge asırıw ushın lizenciyaǵa iye bolǵan yuridikalıq tárepler arasında dúziletuǵın transport quralınıń ijara shártnamaların notarial tastıyıqlaw talabı biykar etilsin jáne olardı mámleketlik salıq xızmeti uyımları málimleme sistemaları arqalı elektron tárizde esapqa alıw sisteması engizilsin.

Mámleketlik salıq komitetine úsh ay múddette usı bántke tiykarlanıp transport quralı ijarası shártnamaların esapqa alıw sistemasınıń iske túsiriliwi jáne onı Transport ministrligi hám Ishki isler ministrliginiń maǵlıwmatlar bazaları menen integraciyalanıwın támiyinlesin. 

5.  2022-jıl 1-sentyabrden 2024-jıldıń aqırına shekem sonday tártip ornatılsın, oǵan muwapıq:

jolawshılardı aydawshıdan tısqarı tórtten artıq bolmaǵan otırǵıshlarǵa iye bolǵan jeńil avtotransport qurallarında jumısı ózin-ózi bánt etken shaxslar shuǵıllanıwı múmkin bolǵan jumıs (jumıslar, xızmetler) túrleri dizimine kirgiziledi;

ózin-ózi bánt etken shaxslar tárepinen jolawshılardı jeńil avtotransport qurallarında tasıw jumısı licenziya qaǵazı tiykarında ámelge asırıladı;

licenziya qaǵazın beriwde avtomobildiń ekspluataciya dáwirine qoyılǵan talap biykar etiledi;

jolawshılardı jeńil avtotransport qurallarında tasıw jumısı menen shuǵıllanatuǵın ózin-ózi bánt etken shaxslar (keyingi orınlarda – ózin-ózi bánt etken tasıwshılar) bir jılda bir márte transport quralın texnikalıq tekseriwden ótkeriwi shárt;

ózin-ózi bánt etken tasıwshılar «7z54an!» málimleme bazasına kirgizilgen kóp tarmaqlı poliklinikalar hám jeke menshik medicina mákemesi arqalı bir jılda bir márte medicinalıq tekseriwden ótkeriliwi shárt;

Jónelissiz taksi jumısı ushın licenziya qaǵazı berilgeni ushın mámleketlik bajı barlıq túrdegi tasıwshılardan jılına bazalıq esaplaw muǵdarınıń bir esesi muǵdarında óndiriledi. Onda mámleketlik xızmetlerdi kórsetkenlik ushın jıyım óndirilmeydi;

Jónelissiz taksi xızmeti jumısına ruxsat beretuǵın licenziya qaǵazlarında jumıs aymaǵı kórsetiledi;

ózin-ózi bánt etken tasıwshılardıń avtomobil transportınıń tóbesine «5AX8» tanımalı belgi toq sarı reńli fonar ornatıladı;

basqa tarawlarda miynet shártnamasına tiykarlanıp bánt bolǵan shaxslar bir waqıttıń ózinde jolawshılardı jeńil avtotransport qurallarında tasıw jumısı menen ózin-ózi bánt etken shaxs sıpatında dizimnen ótken halda shuǵıllanıwı múmkin;

6. Mámleketlik salıq komiteti (Sh.Qudbiev) Transport ministrligi menen birgelikte úsh ay múddette jolawshılardı jeńil avtotransport qurallarında tasıytuǵın hám olarǵa qarıydarlardı izlew boyınsha interaktiv xızmetlerdi kórsetetuǵın isbilermenlik subektleri tárepinen jolawshı tasıwǵa baylanıslı nızamshılıq talapları orınlanıwın qadaǵalaw mexanizmlerin názerde tutatuǵın reje joybarın islep shıǵıp, tastıyıqlaw ushın Ministrler Kabinetine kirgizsin.

7. Transport ministrligi (I.Mahkamov):

úsh ay múddette Ádillik ministrligi, Densawlıqtı saqlaw ministrligi hám basqa da mápdar shólkemler menen birgelikte texnikalıq hám medicinalıq tekseriw, qamsızlandırıw polisi hám licenziya qaǵazların rásmiylestiriw processlerin jeńilletiw maqsetinde «7z54an!» málimleme sistemasın jetilistiriw, «Licenziya» hám basqa da málimleme sistemaları menen uyımlararalıq integraciyanı keńeytiw boyınsha ámeliy ilajlar kórsin;

eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.

8. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.


Ózbekstan Respublikası

Prezidenti      Sh.MIRZIYoEV

Tashkent qalası,

2022-jıl 7-iyul